Mat 4 | KYC | STEP | Dokopa Imambu dokome Yesu nyuo lanyuo yuu muiyane dokona peyamopa Sataneme baa makande piya.

Matthew 4

Sataneme Yesu Makande Piya

(Mak 1:12-13; Lu 4:1-13)

1 Dokopa Imambu dokome Yesu nyuo lanyuo yuu muiyane dokona peyamopa Sataneme baa makande piya. 2 Dokopa baa yuu akalisa kisimape kukwa akalisa kisimape nenge naa nao karapala enakana lopaya. 3 Dokopa Makande Pingi dokome epapala baa lamaiyuo, Emba Anatunya Ikinyingi ramo doko kana dapwa borete inginya lare, leya. 4 Dopa leyamopape Yesumi isingi lamaiyuo, Dopa lao pyasi palamo.

Akali borete dokome iki nao lete kara narami.
Anatunya kambunya pii epelyamo dupwa soo lete kararami ingilyamo leya. ^{▼▼Kana dupwa borete inginya lare. (4:3)}
5 Dokopa Sataneme baa nyuo lanyuo yuu poo pyasi anda malu palyuo karenge dokona papala tembole anda ketae londe mendena karena lao 6 karapala baa dopa lamaiya. Emba Anatunya Ikinyingi ramo doko emba range langa isa pyakala puu. Dokona lao pii pyasi dopa lao palamo,

Banya aŋala dupwa emba rapu pyakana lao jera, lao palipala,
embena kimbu doko kaname isa pyaa nana lao
nakamana kingi kapena emba ketae reto nyerami, lao palamo, leya.
7 Yesumi baa dopa lamaiya, Dee pii mende dopa lao pyasi palamo. Embena Kamongo Anatu doko apa pilyape lao kandalena makande pii nare, leya. 8 Dee Sataneme baa lanyuo yuu kyau kameya ketae mendena papala isa yuu dokona rara peparae au piyamopa kandena lao lasaka piya. 9 Lasaka pipala, Emba pangu sepala namba embena mupwa lao yako lare ramo doko nambame dupwa peparae emba jero, leya. 10 Dokopa Yesumi baa dopa lamaiya, Satane, emba puu. Buku Baepole dokona dopa lao pyasi palamo,

Embena Kamongo Anatu baako suu pyao mona kando kingi lao karare.
Banya yulu iki pyuo karalapape leya. 11 Dokopa Satane doko baa yaki nyepala peyamopa aŋala lapome epapala Yesu nyisiyami.

Yesu Yuu Galili Kanda Soo Yulu Piya

(Mak 1:14-15; Lu 4:14-15)

12 Yesumi Jone baa karapusi anda palyamiŋi leyaminyi sepala baa yuu Galili dokona peya. 13 Yuu Nasarete pao kando nyepala yuu Kapaneame doko ipwa muiyane pete maronge dokona Sepyulanepa Napatalaipa dolapona kanya siyamo dokona peya. 14 Anatunya poropeta akali Aisaya mende piraŋa leyamo dokona karala peya.

15 Pii doko yuu Sepyulanepa yuu Napatalaipa
ipwa Jotane dumurena ipwa kota pete silyamo dorena singi,
wambu rara wakale dupwana yuu Galili dokona
wambu iminjiyamo dokona peteyami dupwa
ama yanga paupau leyamo kandeyami.
16 Wambu kumungi renge dokome yambe piyamo peteyami dupwana lao
yanga paupau lenge doko pyaka sakamiyaŋa lao palamo.
17 Yuu gii dokopa Yesumi kanda soo boo pyao, Yake pandana isingi yulu pyaka selena pilyamo dokona mona enenge palyuo karalapape, lao lao kareya.

Yesumi Oma Nyingi Akali Kisima Kyakale Lao Nyiya

(Mak 1:16-20; Lu 5:1-11)

18 Galili ipwa muiyane pete nemba nembana pao dokopa ane yangonepa lama Saimone kingi mende Pita lenge doko banya yangonge Endurupa nakamba oma nyingi akali ingyuo karapala oma nyingi nyuu doko ipwa dokona pyao pyano malyuo kareyambinyi pao kando nyiya.

19 Kando nyepala nakamba lamaiyuo, Namba paronuli pyuo ipupwape. Nakamba oma nyuo karambinyi doko suu pyao akali yango nyelapape lao piru, leya. 20 Leyamopa nakamba oma nyingi nyuu dusipa aopa yaki nyepala baa peyamuli pyuo peyambi. 21 Dokopa dokona karo mee mende lanapala dee ane yangongepa lama Jemesa Sepetena ikinyingi doko banya yangonge Jonepa kareyambinyi pao kando nyiya. Nakamba sipu dokona rakange Sepetemoo pipya oma nyingi nyuu dusipa lee kyaso paleyaminyi kandapala epena leya. 22 Nakamba aopa rakange bote dokona peteyamopa yaki nyepala baa peyamuli pyuo peyambi. ^{▼▼Baame nakama elya pyuo nyuo kareya. (4:24)}

Yesumi Waili Pii Mana Lamaiyuo Wambu Pyuo Nyuo Piya

(Lu 6:17-19)

23 Dokopa yuu Galili kapa kapa pyuo pao sinakoke anda dupwana mana lao Anatunya isingi yulu dokona waili pii keyange doko boo pyao lao wambu anga wakale wakale piyamo dupwape kingi kimbu kwaeyami dupwape peparae pyuo elya pyuo nyuo pyuo papiya. 24 Dokopa yuu Siria dupwana baa dopa pilyamo lao lao raeyamisa wambu anga pyao randa wakale wakale epeyamo dupwape imambu koo soo pyale leya dupwape manda rengeme mandeya dupwape papae rambungi dupwape anga rara wakale wakale piya dupwa peparae baa kareyamo dokona soo epeyaminyipa baame nakama pyuo elya pyuo nyuo kareya. 25 Dokopa Galili rangepe Dekapolisa rangepe Jerusaleme rangepe Jutia rangepe ipwa Jotane dumurena rangepe wambu ama malu rukuraka pyuo baa peyamuli pyuo peyami.